Проф. д-р Александар Самарџиски
Проф. д-р Александар Самарџиски е роден во с. Смојмирово, Беровско, во 1938 година, а починал во 2001 година во Скопје. Со исклучок на првите две години, целиот свој работен стаж го поминал на Природно-математичкиот факултет како асистент и наставник. Основно образование завршил во родното место, а средно во Берово. Во учебната 1957/58 година се запишал на групата за математика на Природно-математичкиот факултет во Скопје, каде што дипломирал во 1961 г. со среден успех 9,22. Во 1966 година, како асистент на Природно-математичкиот факултет во Скопје, се запишал на постдипломски студии по математика на Природно-математичкиот факултет во Белград кои ги завршил на 10.4.1971 г. со одбрана на магистерската работа под наслов "Коначне геометријске структуре". Во текот на 1972/73 год. престојувал 14 месеци на Универзитетот во Тибинген, СР Германија, како стипендист на DAAD. На 1.6.1974 г. на Природно-математичкиот факултет во Скопје ја одбранил докторската дисертација под наслов "За некои класи Штајнерови системи". По дипломирањето, од 1.9.1961 до 1.9.1964 г. (со прекин за отслужување на воената обврска), работел како професор по математика во гимназијата во Берово, а потоа се вработил како асистент по математика на Природно-математичкиот факултет во Скопје. Во јануари 1972 г. бил избран за доцент по геометрија, а во истото звање преминал и на новоформираниот Математички факултет. Во 1978 г. бил избран за вонреден професор, а во 1984 г. за редовен професор по геометрија на Природно-математичкиот факултет во Скопје. Од 1968/69 година, како асистент, изведувал настава по елементарна и проективна геометрија. По изборот за доцент изведувал настава по предметите елементарна геометрија, проективна геометрија и алгебра (за вонредните студенти од Лесковац). По изборот за вонреден професор изведувал настава по геометриски трансформации, проективна геометрија, теорија на броеви, топологија, практикум, како и еден специјален курс по геометрија (геометрии над алгебри) на постдипломските студии во Приштина. Стручната и научната работа му е доста богата. Има објавено 19 научни трудови (од кои еден во странство), 3 збирки задачи по алгебра и векторска алгебра, 6 стручни труда, 11 учебници или учебни помагала за средно и високо образование, а бил и раководител на три научни проекти.
Copyright © 2015 ИМ-ПМФ
