Проф. д-р Биљана Јанева
Биљана Јанева е родена на 2 јули 1950 г. во Белград. Основно и средно образование стекнала во Скопје. На Математичкиот факултет се запишала во академската 1969/70 г. Студиите на насоката за применета математика ги завршила во 1973 г., со среден успех 9,00. Постдипломски студии запишала на Природно-математичкиот факултет во Загреб во 1974 г., а магистрирала во 1981 г. со одбрана на магистерскиот труд со наслов “Konačnopredstavljive grupe s algoritamski rješivim problemom riječi”. Докторирала на ПМФ во Скопје во 1989 г., со одбрана на дисертацијата со наслов “Некои класи полиадични полугрупи и групи”, изработена под менторство на професор д-р Ѓорѓи Чупона. Држела настава по предметите: математичка логика и алгебра, алгебарски дискретни структури, алгоритми и автомати, формални јазици и автомати и алгебра за студентите по информатика, множества и логика, алгебра I, алгебра II, алгебра III за студентите по математика и алгебра и одбрани делови од алгебрата за студентите на двопредметните студии по математика-физика. Учествувала во реализацијата на повеќе научни проекти на Институтот за математика, Институтот за информатика, како и во проекти под раководство на проф. д-р Ѓорѓи Чупона преку МАНУ. Објавила 2 труда во меѓународни списанија, 6 труда во македонски списанија, 5 труда во зборници на меѓународни научни собири. Учествувала со презентации на конференциите за алгебра и логика, на конференцијата за алгебарски и дискретни структури во Дармштат (2 пати), во Потсдам и на летната школа по алгебра во Јесеник во Чешка. Во периодот 1983-1990 г. учествувала на семинарите по векторско-вредносниалгебарски структури, а понекогаш и на семинарот Вторник во 5 на Институтот за информатика при ПМФ. Во 1993 г. била раководител на семинарот Алгебри и комплекси организиран при Институтот за информатика. Во 1994, 1995 и 1996 г. учествувала на семинарите (во рамките на постдипломските студии) по предметот логика со примени, во 1995/96 г. учествувала на семинарот Теорија на евиденцијата. Била ментор на неколку магистерски труда на Институтот за информатика и на Институтот за математика.
