Доц. д-р Самет Кера
Роден на 17 февруари 1968 г. во село Житоше - Крушево, кадешто со одличен успех го завршил основното образование. Во 1986 г. во Скопје со одличен успех го завршил средното образование во УСО "Зеф Љуш Марку". По отслужувањето на воениот рок, во 1987 год., се запишал на Природно-математичкиот факултет во Скопје (Група за математика). Студиите ги завршил во 1991 г. со средна оценка 9,1 како најдобро дипломиран студент на генерацијата на Природно-математичкиот факултет. Бил студент на постдипломските студии од 1992/93 год. Предвидените испити ги положил со доста висок просек, а го подготвувал и својот магистерски труд. Се вработил во 1992 г. како помлад асистент на Природно-математичкиот факултет во Скопје (Група за математика). Држел вежби по неколку предмети за студентите од групите за математика, математика-физика и информатика, како: топологија, анализа 3, диференцијална геометрија, мера, интеграл и специјални функции на Групата за информатика; математика 1, аналитичка геометрија на групата за математика - физика; математика 2 на Педагошкиот факултет и математика на Шумарскиот и на Фармацевтскиот факултет. Повеќе години бил член на Комисијата за спроведување натпревари по математика во средните училишта во Р. Македонија. Објавил 5 труда до неговиот избор за доцент во 2002 г. Магистрирал во 1997, а докторирал во 2001 година на тема "Пермутациски производи на многуобразија и нивна примена". По изборот за доцент држеше настава по диференцијална геометрија на студиите за математика, а подоцна беше ангажиран со настава по математика на Педагошкиот факултет во Скопје, и на Штуловиот универзитет. Од фамилијарни причини замина во Белгија.
Copyright © 2015 ИМ-ПМФ