Проф. д-р Живко Мадевски
Роден на 12 октомври 1929 г. во Куманово. По завршувањето на средното образование во родното место се запишал на студии по математика на Филозофскиот факултет во Скопје и со успех ги завршил во 1954 г. По дипломирањето работел како професор по математика во гимназиите во Скопје и во Гостивар. Во текот на 1956 г. бил избран за асистент на Институтот за математика, каде што работи сè до 1.10.1995 г., кога заминал во пензија како редовен професор. Учебните години 1960/61 (делумно) и 1961/62 ги поминува во Безансон, Франција, како стипендист на Француската влада и на тамошниот Природно-математички факултет се стекнал со сертификат од III степен по небеска механика. Во 1973 г. на Природно-математичкиот факултет во Скопје ја одбранил својата докторска дисертација "Некои методи за добивање релации меѓу елементите од еден триаголник". Како асистент се вклучил во наставата на Институтот и водел вежби по повеќе предмети, а по изборот за наставник во 1964 г. изведувал наставата по теориска механика, аналитичка геометрија, линеарна алгебра и други, а повремено гостувал како наставник и на Фармацевтскиот, Економскиот и други факултети во Скопје. Тој е извонреден методичар, дидактичар, педагог, автор или коавтор на повеќе (околу петнаесет) учебници за основното и за средното образование. Во научноистражувачката работа неговите интересирања се насочени најнапред кон алгебрата, потоа кон небеската механика (каде што, главно, го проучува проблемот на три тела). Во геометријата посебно се интересира за геометриските неравенства, област од која е и неговата докторска дисертација. Од сите области има објавено повеќе трудови. Општествената ангажираност на проф. Мадевски, којашто е мошне забележителна, и е сврзана пред сè, со неговата стручно-педагошка дејност. Тој стручно бил многу активен во Друштвото на математичарите (бил претседател на Друштвото, повеќегодишен член на неговото раководство, организатор на натпревари, еден од организаторите и повеќепати предавач на Школата за млади математичари), Педагошкиот завод (надворешен соработник - увиди, наставни програми, предавач на курсеви итн.),"Просветно дело" (автор на учебници, рецензент и референт на повеќе учебници итн.). Забележително е и неговото учество во органите и комисиите на Универзитетот и Факултетот (член на Универзитетскиот совет, член и претседател на Советот на Факултетот, декан на Математичкиот факултет, директор на Математичкиот институт итн.). Бил член и претседател на Републичкиот педагошки совет. За повеќегодишната работа и за општествената ангажираност добитник е на наградата "Климент Охридски", а одликуван е и со Орден на трудот со сребрен венец и со Орден на трудот со златен венец. Почина на 9 јули 2018 година во Скопје.
Copyright © 2015 ИМ-ПМФ
